Ақтөбеде электр энергиясының бағасы тағы да қымбаттады

 Ақтөбе облысында 1 сәуірден бастап электр энергиясының орташа тарифі 15,5%-ға қымбаттап, 38,86 теңгеге жетті, деп хабарлайды BAQ.KZ тілшісі.

Облыста былтыр электр энергиясының құны бірнеше рет көтерілген болатын. Биыл тағы 15,5 пайызға артып отыр. Бұл жаңалықты ақтөбеліктер ауыр қабылдады. Көпшілік жалақының өспей, коммуналдық қызметтер құнының қымбаттағанына наразылықтарын білдірді. Тіпті Ақтөбе қаласындағы бау-бақша ұжымдарының тұрғындары қала әкімдігіне барып шу шығарды.

Ақтөбенің ескі қала бөлігіне жақын бау-бақша ұжымдарының бірінде тұрамын. Былтырдан бастап жарыққа 24 теңгеден төлеп отырмыз. Қала тұрғындарының тарифіне қарағанда бізде тариф құны 6-8 теңгеге қымбат. Біз неге қала ішінде тұрып, бөлек тариф төлеуіміз керек? Енді, міне, 1 сәуірден бастап тағы да электр энергиясының құны өсіп отыр. Қымбатшылық жан-жақтан қысып барады, – дейді саяжай тұрғыны Эльвира Тұралина. 

Біз тарифтерді көтеруге мүдделі “Энергосистема” ЖШС-ға хабарласқанбыз, алайда мекеме мамандары бағаға қатысты жауап беруден бас тартты. 

Табиғи монополияларды реттеу комитетінің Ақтөбе облысы бойынша департаментінің басшысы Ерлан Дүйсен тұтынушылармен өткізілген қоғамдық тыңдаулар аясында электр энергиясының орташа тарифі 1 кВт/сағ үшін 38,86 теңгеге өскенін жеткізді.

Бұл – орташа тариф мөлшері. Ал электр энергиясын өздерінің тұрмыстық мұқтаждығы үшін пайдаланатын тұтынушылар үшін тариф құны – 19,94 теңге, заңды тұлғаларға – 49,99 теңге, бюджеттен қаржыландырылатын заңды тұлғаларға – 67,07 теңге, әлеуметтік маңызы бар азық-түлік тауарын өндірушілер мен экономикалық-индустриялық аймақтарда орналасқан тұтынушылар үшін 38,86 теңге болып бекітілді, – дейді ол.