Қазақстанда қылмыстық-атқару жүйесі мекемелерінде жазасын өтеп жатқан азаматтарды ұстау шарттарын өзгерту жоспарланып отыр. Тиісті бұйрық жобасын Қазақстан Республикасы Ішкі істер министрлігі жариялады, деп хабарлайды BAQ.KZ.
Құжат қылмыстық-атқару жүйесі мекемелерінің ішкі тәртіп қағидаларына өзгерістер енгізуді көздейді. Түзетулер сотталғандардың мінез-құлқын бағалау жүйесіне де қатысты.
Ұсынылып отырған негізгі өзгерістер:
- мінез-құлқының үшінші оң дәрежесі бар сотталғандарға «тыныштық сағаты» енгізілуі мүмкін;
- қауіпсіздік деңгейі ең төмен мекемелерде жазасын өтеп жатқан азаматтарға мекеме аумағынан тыс жерде смартфон пайдалануға рұқсат беру жоспарланып отыр;
- қауіпсіздік деңгейі ең төмен мекемелерде сотталғандар кездесу және қалаға шығу туралы өтініштерді өз-өзіне қызмет көрсету терминалдары арқылы бере алады.
Жоба авторларының мәліметінше, терминалдарды енгізу сотталғандар мен мекеме қызметкерлері арасындағы тікелей байланысты азайтуға бағытталған.
Әзірлеушілер құжатты қабылдау әлеуметтік-экономикалық немесе құқықтық теріс салдарға әкелмейтінін атап өткен.
Қазіргі уақытта бұйрық күшіне енген жоқ. Құжат «Ашық НҚА» порталында жарияланып, 11 наурызға дейін қоғамдық талқылауда болады.