Елімізде саусақ ізін кімдер тапсыруға тиіс?

Сенат депутаттары “Қазақстанның кейбір заңнамалық актілеріне “Азаматтарға арналған үкімет» мемлекеттік корпорациясы, “Астана Хаб” халықаралық технологиялық паркі және дактилоскопиялық тіркеу мәселелері бойынша өзгерістер мен толықтырулар енгізу туралы” заңды мақұлдады, деп хабарлайды BAQ.KZ тілшісі.

Енді қазақстандықтар саусақ іздерін тапсыруға міндеттелмейді. Себебі, заңдағы мұндай норма алынып тасталған.

Заңмен енгізілген маңызды жаңашылдықтың бірі – дактилоскопиялық тіркеу туралы ережелер. Мысалы, “Дактилоскопиялық және геномдық тіркеу туралы” 2016 жылғы 30 желтоқсандағы заңның 2-тарауында Қазақстан азаматының паспортын немесе жеке куәлігін алу үшін алғаш рет жүгінген, сондай-ақ бұрын дактилоскопиялық тіркеуден өтпеген Қазақстан азаматтары оны қалпына келтірген, ауыстырған жағдайда Қазақстан азаматтарын міндетті дактилоскопиялық тіркеу туралы нормалар белгіленген болатын. “Дактилоскопиялық және геномдық тіркеу туралы” заңның 39-бабымен 2-тараудың қолданысы 2024 жылғы 1 қаңтарға дейін тоқтатылған, – деп жазылды заң қорытындысында.

Қазақстан азаматтары үшін олардың келісімімен ғана ерікті дактилоскопиялық тіркеу енгізілмек.

Дактилоскопиялық және геномдық тіркеу туралы” заңда белгіленген жағдайларда 16 жасқа толған шетелдіктер мен азаматтығы жоқ адамдар үшін міндетті дактилоскопиялық тіркеу енгізіледі. Шетелдіктер мен азаматтығы жоқ адамдар үшін жеке сәйкестендіру нөмірін алуға Қазақстан аумағындағы тіркеуші органдарға жеке өзінің жүгіну талабы енгізіледі. Бұрын олар мұны басқа адамдарға берілген сенімхат негізінде нақты орналасқан жері бойынша жасай алатын, – делінген жазбада.

Дактилоскопиялық тіркеуге қатысты ережелер 2024 жылғы 1 қаңтардан бастап күшіне енеді.