Астана қасындағы ауыл қоқыс сасып жатыр

 BAQ.KZ ақпарат агенттігіне Астана қаласының қасында орналасқан Талапкер ауылының тұрғындары қоқыс мәселесі бойынша шағым түсірді.

Біздің ауылымызда өте үлкен проблема шығып тұр. Қоқыстың уақытылы шығарылмағандығынан есік алдында жүру мүмкін болмай кетті. Күн жылынса, түрлі аурулар тарайтыны анық. Қоқыс команиясына сөзіміз өтпей отыр, – дейді Алма есімді ауыл тұрғыны.

Қоқыс шығару кестесі бойынша әр көшеде тұрған қоқыс контейнерлері аптасына 2 рет босатылады. Алайда тұрғындардың айтуынша, қоқысты бір жұмада екі рет шығару аздық етеді, қоқыс ертесіне-ақ қайта толады. Сондай-ақ контейнерлер саны да жеткіліксіз.

3 контейнер тұруы керек жерлерге 2 контейнер қойған. Олардың дөңгелектерінің бәрі сынып қалған, кейде құлап жатады. Менің түсінгенім бойынша, басты көшелерге ғана 2 контейнерден қойған, ал басқа көшелерде тек 1 контейнерден, – дейді 72-көше тұрғыны.

Талапкер ауылының тұрғыны Құттыбай Ақатайұлы қазір қызмет көрсетіп жатқан қоқыс компаниясы тендер ұтып алғанын айтты. Алайда қазір ауыл тұрғындарына қызмет көрсетуден бас тартып жатыр екен.

Бүкіл Талапкерде контейнерлер аз. Шарт бойынша контейнерлерді аудан қояды. Қалған 30 пайызын келген компания қояды. Әзірге мына компания 20 шақты ғана контейнер әкелді. Бүгінде бұл компания “жұмыс істемейміз” деп, бас тартып жатыр. Дегенмен тендер ұтып алған. 10 жылға ұтып алыпты деп айтып жатыр. Бұның алдындағы компания әп-әдемі істеп келе жатқан еді. Мына компания келіп, оларды ысырып тастады. Шамасы әкімдікте ме қолдаушылары бар. Солай келген компания енді жұмыс істемейміз деп жатыр, – деді тұрғын.

Біз осы мәселе бойынша Талапкер ауылының әкімдігіне хабарластық.

Кесте бойынша 1 күнде 25 көшенің қоқысын шығару керек. Оған үлгеру үшін бір күнде полигонға 3 рет барады, 25 көшені үлгермейді. Түнде шығарса, таңертең толып тұрады. Адамдар қоқысқа пакетпен барып, қоқысты төгеді де, пакетті үйіне алып кетеді. Сондықтан қағаздың бәрі ұшады. Оны өз көзіммен көремін. Сосын қапшықпен күл шығарады, біз пеш жағамыз ғой. Ауылда газ жоқ. Оның да қапшығын төгіп, алып кетеді. Сосын жиһаздар мен құрылыс материалдарын да сол контейнерлерге шығарады. Халықтың да кінәсі бар. Бірақ контейнер негізі аз, – деді қоқыс шығаратын компания бақылаушысы Балбөпе Сейдахметова.

Ол сондай-ақ қоқысты шығаруға контейнер мен жолдың арасындағы жердің батпақ болып жатуы да кедергі екенін айтты. Ал контейнер санын көбейту мәселесі бойынша Тұрғын үй-коммуналдық шаруашылық бөлімінің басшысы Асылбек Сапарбаев жауап берді.

Қоқыс контейнерлері санын көбейту үшін наурызда бюджетке өтінім бердік, қаржыландыруды күтіп отырмыз. Аудан әкімі де, басқалар да бұл мәселеден хабардар, – деді ол.