Алматыда әлеуметтік бизнесті қалай қолдайды
Алматыдағы әлеуметтік бизнес
Алматыда әлеуметтік кәсіпкерлікті қолдау шаралары жүйелі түрде жүзеге асырылып келеді. «Алматы» ӘКК 36 кәсіпкерге жеңілдетілген шарттармен тұрғын емес үй-жайлар ұсынды.
Жалға алу мөлшерлемесі бір шаршы метр үшін небәрі 0,1 АЕК (432,5 теңге), бұл нарықтағы бағадан айтарлықтай төмен. Үй-жайлар корпорация балансындағы қолжетімді нысандар пайда болған сайын ӘКК сайтында жарияланатын конкурс арқылы беріледі. Оған әлеуметтік кәсіпкерлік тізіліміне енген кәсіпкерлер қатыса алады.
Инклюзия, денсаулық сақтау және білім беру салаларындағы жобаларға басымдық беріледі. Ұзарту мүмкіндігімен 3 жылға дейін жалға алуға болады. Сонымен қатар жөндеу жұмыстарына 3 айға дейін жеңілдетілген кезең қарастырылған.
Бағдарлама аясында оңалту орталықтары, білім беру курстары, шығармашылық кеңістіктер, сондай-ақ осал санаттағы әйелдерді жұмыспен қамтитын тігін өндірістері ашылды.
Бағдарламаның нәтижесінде жалпы саны 226 тұрақты жұмыс орны құрылды.
Әлеуметтік кәсіпкерлікті қолдау қаланың дамуына серпін беріп, тұрғындардың тұрмыс деңгейін арттыруға ықпал етеді.