Түркістан облысының діни мекемелеріне Құран кітаптары тапсырылды

Түркістан қаласындағы Қожа Ахмет Яссауи атындағы орталық мешітінде рухани маңызы бар іс-шара өтті. Оған Кувейт мемлекетінің Қазақстан Республикасындағы төтенше және өкілетті елшісі Омар Ахмет Әль-Қандари, Түркістан облысы әкімі аппаратының басшысы Еркеғали Әлімқұлов, Қазақстандағы халықаралық ислам қайырымдылық ұйымының директоры А.Мохамед Али, ҚМДБ-ның Түркістан облысы бойынша бас имамы Е.Төлепов, Түркістан облысы дін істері басқармасының басшысы Р.Сабыржанұлы, Қазақстандағы халықаралық ислам қайырымдылық ұйымының қызметкерлері, ҚМДБ-ға қарасты қайырымдылық мекемелерінің директорлары, қала, аудандағы бас имамдары қатысты.

Маңызды басқосуда сөз алған Түркістан облысы әкімі аппаратының басшысы Еркеғали Әлімқұлов аталған шараның маңыздығына тоқталып, қадірлі меймандарға Түркістан облысының әкімі Дархан Сатыбалдының алғысын жеткізді.

– Киелі Түркістан қаласына қош келдіңіздер! Түркістан – сан ғасыр бойы түркі әлемінің маңызды орталығы болған. Бүкіл түркі дүниесіне әйгілі ойшыл, ұлы ұстаз – Қожа Ахмет Ясауи осы шаһарда өмір сүрген. Оның хикметтері, діни-философиялық туындылары адамзат ойының асыл жауһары болып саналады. Өзінің «Диуани хикмет» еңбегі арқылы күллі мұсылмандар үшін қасиетті Құран кітабын түрік тілінде сөйлете алды. Бүгінде Құранды жаттауға ықылас танытып, ниет білдіргендер саны күннен күнге көбейіп келеді. Оларға қолайлы жағдай жасап, тиімді тәсілдермен дәріс беру – дін қызметкерлерінің міндеті. Бұл қазіргі заманның өзекті мәселелерінің бірі. Осыған орай, 1 600 дана қазақша мағынадағы қасиетті Құран кітабын, 10 мың дана «Муалим сани» кітабын Түркістан облысының имамдарына табыстауға ниет білдірген Кувейт мемлекетінің елшілігіне, Халықаралық ислам қайырымдылық ұйымының Қазақстан Республикасындағы өкілдігіне өз алғысымды айтамын. Екі елдің арасындағы ынтымақтастықты бұдан әрі нығайтуға өз үлесімізді қоса берейік, – деді аппарат басшысы.

Салтанатты жиында Түркістан облысы аумағында діни білім беру орындары, кітапханалар мен мешіттерге ҚР мәдениет және ақпарат министрлігінің Дін істері комитетінің дінтану сараптамасы мен Қазақстан мұсылмандары діни басқармасының сараптауынан өтіп, мақұлданған «Құран Кәрім аудармасымен және түсініктемелері» кітабының 1 600 данасы және «Мұғәлім сәні» кітабының 10 мың данасы табысталды. Игі іске Халықаралық ислам қайырымдылық ұйымы қолдау көрсетті.

Кувейт мемлекетінің Қазақстан Республикасындағы төтенше және өкілетті елшісі Омар Ахмет Әль-Қандари екі ел арасындағы байланыстың жоғары деңгейде екеніне тоқталды.

Айта кетейік, Қазақстан мұсылмандары діни басқармасынының 764 мешіті Түркістан облысында жұмыс істейді. Облысымызда имамдардың біліктілігін арттыру бағытында жүйелі шаралар қабылдануда. Қазақстан Республикасының Президенті жанындағы Мемлекеттік басқару академиясы мен Қазақстан мұсылмандары діни басқармасымен бірлесіп, 112 имам мен «Дін мәселелерін зерттеу орталығындағы» 18 теолог біліктілігін арттырды. Қосымша 100 мешіттің имамы Алматы қаласындағы Ислам институтында 2 айлық курстан өтіп жатыр. Бұл жұмыстар өз жалғасын табады.

Ауыл шаруашылығы өнімдерін сақтау, тиімділігін арттыру мақсатында Түркістан облысы, Сауран ауданында 1 гектар аумақта көкөніс сақтау қоймасының құрылысы басталды. Бұл туралы Орталық коммуникациялар қызметінің алаңында облыстың әлеуметтік-экономикалық дамуы туралы есеп беру барысында Түркістан облысының әкімі Дархан Сатыбалды мәлім етті.

– Түркістан облысында ауыл шаруашылығы жақсы дамыған. Өнім көлемі жыл сайын артып келеді. Дегенмен өнімді сақтау және терең өңдеу мәселелері өзекті. Біз осыған мән берудеміз. Жуырда Түркістан қаласының іргесіндегі аумақта көкөніс сақтау қоймасының құрылысы басталды. Жоба құны – 1,4 млрд. теңге, қуаттылығы – 4 000 тонна. Келесі жылы пайдалануға тапсырылады, – деді облыс әкімі.

Аймақта кәсіпкерлерді қолдау мақсатында келесі жылдан бастап, қоймаларды салу үшін жұмсалатын инвестициялық шығынның 50 пайызын өтеу қарастырылып жатыр.

Тағы айта кетерлігі, облыс халқының 80% ауылда қоныстанған. Негізгі кәсібі – ауыл шаруашылығы. Басқа саламен салыстырғанда табыс төмен. Осыған орай, ауыл халқының әл-ауқатын жақсарту мақсатында Мемлекет басшысының тапсырмасына сәйкес биылдан бастап «Ауыл аманаты» жобасы 6 бағытта іске асырылуда. Бұл мақсатқа бюджеттен 19,8 млрд. теңге бөлінді. Пилоттық жобаға 64 ауылдық округ белгіленді.

Бүгінгі таңда, 14,8 млрд. теңгеге 2 496 жоба қаржыландырылды. Жобаны іске асыру нәтижесінде 3 413 жаңа жұмыс орны ашылады, қосымша 30 млрд. теңгеге өнім өндіріледі. Жобаға қатысушылардың орташа табыс өседі, атаулы әлеуметтік көмек алушылар саны азаяды, қайта өңдеу кәсіпорындарының жүктемесі ұлғаяды деп күтілуде.