Түркістан облысында мал ұрлығымен айналысқан адамдар тобы құрықталды

Түркістан облысында полиция қызметкерлері Шардара ауданында мал ұрлығын кәсіп еткен адамдар тобын құрықтады. Тексеру кезінде күдіктілердің екі мал ұрлығына және аккумулятор ұрлығының екі дерегіне қатысы бар екені анықталды.

Күдіктілер түнгі уақытта қоралары үйлерінен алыс орналасқан көршілерінің мүлкін ұрлап, оны сатып, ақшаны бөліп алған. Олар қамауға алынып, тергеп-тексеру амалдары жүргізіліп жатыр. Ұрланған затты сатып алушылардан бірнеше қой мен аккумуляторлар тәркіленіп алынды. Аталған қылмыс республикалық “Мал ұрысы” жедел-профилактикалық іс-шарасы аясында анықталды.

Қазіргі таңда мал ұрлығының алдын алу мен ашу мақсатында полицейлер ветеринариялық қызметтерді тарта отырып, ұрланған мал мен ет өнімдерін тасымалдаудың ықтимал бағыттары бойынша күшейтілген блок-посттар қойды. Ауыл шаруашылығы жануарларын өткізу және сою орындарында рейдтік іс-шаралар жүргізіліп жатыр.

Түркістан облысы ПД баспасөз қызметі

Қоғам өмірінде мал ұрлығы өршіп тұр. Шын мәнінде мал ұрлығы жылдың қай мезгілінде де бәсеңдемейді.

2019 жылғы 27 желтоқсанда қабылданған «Қазақстан Республикасының кейбір заңнамалық актілеріне қылмыстық, қылмыстық-процестік заңнаманы жетілдіру және жеке адам құқықтарының қорғалуын күшейту мәселелері бойынша өзгерістер мен толықтырулар енгізу туралы» Заңында мал ұрлығына қатысты жаза барынша қатаңдатылды. Мал ұрлығы жеке бап болып енгізіліп,төрт түлікке қырғидай тиетіндер бұрынғыдай жеңіл жазамен құтылмайтын болды. Бүгінгі күні соттарда мал ұрлаушылардың қылмысы жалпы ұрлыққа кірмей, арнайы баппен қаралуда. Бұл бап ауыр санатқа жатады және сотталушыға бас бостандығынан айыру жазасы тағайындалады.

Заңдағы 188-1-бапта бөтеннің малын ұрлағандардың мүлкі тәркіленіп, үш мың айлық есептiк көрсеткiшке дейiнгi мөлшерде айыппұл салуға не сол мөлшерде түзеу жұмыстарына, бес жылға дейiнгі мерзімге бас бостандығынан шектеуге немесе сол мерзімге бас бостандығынан айыруға жазаланатыны көрсетілген.

Ал енді алдын ала сөз байласу арқылы мал ұрлаған қылмыстық топтың, ірі мөлшерде мал ұрлаушылардың жазасы бұдан да ауыр. Олардың да мүлкi тәркiленiп, үш жылдан жеті жылға дейiнгi мерзiмге бас бостандығынан айыруға жазаланатын болса, тұрғын үй-жайдың, кәсіпорынның, ұйымның, мекеменің, мал қораның, қашаның немесе өзге де қойманың ауласына кiрумен, бірнеше рет, аса ірі мөлшерде және қылмыстық топ жасаған мал ұрлау бойынша жаза одан әрі қатаңдатылған. Жалпы мал ұрлағандарды табу, ұстау қандай қиын болса, қылмысты дәлелдеу мен жоғалған тұяқты орнына қою одан да күрделі. Біреудің қорасындағы малды болмашы ақшаға сата салатын қылмыскерлер өз қателігін мойындап, кешірім сұрап, көбінесе ұрлағанын орнына қойып береді. Бірақ, жоғалғаны табылған жәбірленуші енді «Қайтқан малда береке бар» деп дау қумай мәселені жылы жауып қоя алмайтынын ескеру керек. Себебі, шығынды өтеп, істі болған қылмыскерлер жәбірленушілермен келісімге келе алмайды.

Мал ұрлығын басқа қылмыстармен салыстырмау керек. Себебі, мал шаруашылығымен күн көріп отырған ауыл халқының төрт түлігіне қол сұғу табыс көзінен айырумен тең.

Ақпарат https://www.gov.kz/memleket/entities/kyzylorda-zhanakorgan/press/news/details/506452 сайтынан алынды