Түлкібас ауданында ел тыныштығы мен азаматтардың қауіпсіздігін қамтамасыз ететін тәртіп сақшылары үшін ерекше шара ұйымдастырылды. Оған аудан әкімі Асқар Естібаев арнайы қатысып, полиция қызметінің қоғамдағы рөліне тоқталды.
«Бүгін біз тек кәсіби мерекені ғана емес, бейбіт күнде ел тыныштығын күзетіп жүрген азаматтарды ұлықтап отырмыз. Полиция – жай ғана жұмыс емес, бұл – төзімділік пен ерлікке толы өмір салты. Мемлекет басшысы Қасым-Жомарт Тоқаевтың айтуынша, мемлекетке қызмет ету – ең құрметті әрі жауапты міндет. Сіздер тәртіп пен заңдылықты қамтамасыз етуде, азаматтардың құқықтарын қорғауда айтарлықтай үлес қосып келесіздер», – деді ол.
Салтанатты шара аясында бірқатар полиция қызметкерлеріне аудан әкімінің Құрмет грамоталары мен медальдар табысталды. Сондай-ақ шендері жоғарылаған қызметкерлер де марапатталды. Осылайша қоғам тыныштығын күзетушілер бас қосқан бұл мереке патриотизм мен адал қызметтің үлгісіне айналды.