ТОП–5: Адамнан кейінгі ең ақылды жануарлар анықталды

 Ғалымдар адамнан кейінгі ең ақылды жануарларды атады. Сарапшылар бұл рейтингті жасау кезінде жануарлардың когнитивтік қабілеттерін, құрал қолдану дағдыларын, әлеуметтік мінез-құлқын және өзін-өзі тану ерекшеліктерін негізге алған, деп хабарлайды BAQ.KZ тілшісі BBC Science-ке сілтеме жасап.

Міне, 2025 жылғы зерттеулер бойынша ақылды тіршілік иелерінің үздік бестігі:

1. Шимпанзе
   Шимпанзелер адамға ең жақын генетикалық туыстардың бірі. Олар аң аулау үшін найза жасай алады, құралдарды еркін пайдаланады және символдар арқылы байланыс орнатады. Кейбір шимпанзелерде абстрактілі ойлау мен есте сақтау қабілеті жоғары дамыған.
2. Дельфин
   Бөтелке тұмсықты дельфиндер күрделі дыбыстық сигналдар арқылы өзара қарым-қатынас орнатады. Олар айнадағы бейнесін танып, құралдарды пайдалана алады және әлеуметтік құрылымдары өте дамыған.
3. Піл
   Пілдердің жады өте мықты. Олар өзін айнадан тануға қабілетті және құралдарды пайдаланады. Сонымен қатар, пілдерде қайғыру, көмектесу, кешірім сияқты эмоциялық күйді білдіретін әрекеттер байқалады.
4. Қарға
   Corvidae тұқымдасына жататын қарғалар мен сауысқандар өте зерек. Олар құрал жасап, күрделі тапсырмаларды шеше алады, тіпті басқа құстардың әрекеттерін болжайтын қабілетке ие. Кейбір қарғалар өткен тәжірибелерді еске алып, болашаққа жоспар құрады.
5. Сегізаяқ
   Сегізаяқтар – омыртқасыздардың ішіндегі ең ақылдысы. Олар лабиринттерді шешіп, қорғаныс стратегияларын өзгертіп, құралдарды қолдана алады. Сонымен қатар, түстер мен пішіндерді ажырату қабілеті де жоғары.