Оқиға Тельман шағынауданында болған. Полиция күдіктінің табылып, қамауға алынғанын хабарлады.
25 тамыз күні кешкі уақытта 102 арнасына жергілікті тұрғынның мәйіті табылғаны туралы хабарлама келіп түскен.
Оқиға орнына дереу жедел-тергеу тобы жеткен. 40 жастағы ер адамның мәйітін қарау кезінде әртүрлі дене жарақаттары анықталған.
Аталған жайт ҚР ҚК-нің 106-бабының 3-бөлігі “Абайсызда жәбірленушінің өліміне әкеп соққан денсаулыққа қасақана ауыр зиян келтіру” бойынша тіркелді.
«Күдікті ұсталды. Ол марқұмның 47 жастағы танысы болып шықты. Белгілі болғандай, ер адамдар арасында төбелес шығып, күдікті қарсыласын нокаутқа түсіріп, кетіп қалған. Қазіргі уақытта ұсталған адам қамауда. Тергеу амалдары жүргізілуде» делінген полиция мәліметінде.
Еске салсақ, біз бұған дейін Шымкентте ер адам төбелестен кейін көз жұмғаны туралы жазған болатынбыз. «Шұғыл шақырылым» бағдарламасы тілшісінің мәліметінше, екі ер адамның арасындағы төбелес соңы оның бірінің өліміне әкеп соққан.