Саяси сахнада жаңа сценарий: Ердоған Имамоғлысыз сайлау өткізе ме?

Философия ғылымының кандидаты, халықаралық сарапшы Жанат Момынқұлов Түркиядағы Ердоған мен Имамоғлы арасындағы шиеленісті билікке талас деп бағалайды. Оның пікірінше, елдегі саяси дағдарыстың түп-төркіні – экономикалық тоқырау мен әділетке деген сұраныс, деп хабарлайды BAQ.KZ тілшісі.

Бұл – билік үшін тайталас. Ердоған елдегі басты оппозициялық тұлға – Имамоғлының ықпалын әлсіретуді көздеп отыр. Себебі 2028 жылы президент сайлауы өтеді. Сол сайыстан оны шеттету қажеттілігі туындаған сияқты, – дейді сарапшы.

Оның айтуынша, Ердоғанның билігі әбден орнығып, күш алған. 20 жылдан астам уақыт бойы ел басқарған президент мемлекеттік органдарды өз қолына шоғырландырды. Ендігі үміт – әділ сайлауда.

Жуырда 15 миллион халық Имамоғлына қолдау білдірді. Бұл – жай ғана саяси акция емес. Елдегі әлеуметтік-экономикалық ахуалдың салдары. Түркияда соңғы жылдары гиперинфляция күшейіп, халықтың тұрмысы нашарлады. Жемқорлық деңгейі артып, елдің рейтингі Еуропадағы жетекші орындардан сырғыды. Батыспен қарым-қатынас та нашарлаған соң, шетелдік инвестиция да азайды, – дейді Жанат Момынқұлов.

Ол мұны нақты саяси дағдарыс деп есептейді. Дегенмен Ердоған билігінен айырылып қалуы екіталай екенін айтады. Ол алдағы сайлауға дайындалып жатыр. Бірақ Имамоғлымен емес, танымалдығы төмендеу қарсыласпен сайлауға түсуі мүмкін. Мысалы, Өзгүр Өзел секілді саясаткерлермен. Ердоғанның бір ерекшелігі – ол қарсыласын өзі таңдайды, – дейді сарапшы.

Момынқұловтың пікірінше, Түркияны дағдарыстан алып шығатын жаңа лидер керек. Халық шаршаған. Бірақ дәл қазіргі сәтте Ердоған бұл бәсекеде жеңімпаз атануы ықтимал. Екі тарап өзара келісімге келуі тиіс. Себебі бұл тек екі адамның емес, тұтас елдің тағдыры, – деп түйіндеді Жанат Момынқұлов.

Бұған дейін хабарлағанымыздай, Түркияда екі мыңға жуық адам қамауға алынды. Қамауға алынған қала мэрі Экрем Имамоглудың жақтастары оны босатуды және тез арада сайлау өткізуді талап етті.