Салықтан жалтарғандар қалай жазаланады

Қарағанды облысының прокурорлары табыстарын жасырып, салық төлеуден жалтарған ауыл шаруашылығы тауарын өндірушілерді анықтады, деп хабарлайды BAQ.KZ.

Қарағанды облысының прокуратурасы әлеуметтік маңызы бар азық-түлік тауарларының (бұдан әрі – ӘМАТ) жыл сайынғы тапшылығы және бағасының өсуі себептеріне талдау жүргізді. Талдау мақсаты – шекті сауда үстемесін қолдана отырып, ӘМАТ бағасын реттеу. 

ӘМАТ-ті (картоп) қаржылық есепте көрсетпей сататын 14 ірі ауыл шаруашылығы тауарларын өндірушілері анықталды. Нәтижесінде картопты кейіннен сату кезінде шекті сауда үстемесі қолданылмаған. Облыс прокуратурасының үйлестіруі бойынша мемлекеттік кірістер органдары аталған тұлғаларға қатысты камералдық бақылау жүргізді. 

Бүгінгі күні 4 өндіруші қосымша салық есебін тапсырып, 1,6 млрд теңге көлемінде қосымша табыс көрсетіп, 8,8 млн теңгеден астам сомада салық төледі және келешекте картопты қаржылық есепте көрсетіп сатуға міндеттенді, – делінген таратылған ақпаратта.

Қалған өндірушілер бойынша Мемлекеттік кірістер комитеті бұзушылықтарды жою туралы хабарламалар дайындауда, орындалмаған жағдайда тексеру шаралары жүргізіледі. 

Осындай талдау өндіріс, қызмет көрсету және құрылыс қызметінің барлық салаларында жүргізілуде. Бұл мәселе облыс прокуратурасының тұрақты бақылауында.