Полицейлер көп таралған интернет-алаяқтықтың түрлері туралы еске салды

СҚО-да полицейлер көп таралған интернет-алаяқтықтың түрлері туралы еске салды, – деп хабарлайды Polisia.kz.

Петропавл тұрғыны инвестициялық компанияның жарнамасына сеніп, барлық жинағын пайдаланды, таныстарынан қарызға ақша алып, 8 миллион теңгесін “инвестицияға салған”. Ақша бірден алаяқтардың қалтасына түсті. Қазіргі уақытта полицейлер жедел-іздестіру және тергеу іс-шараларын жүргізіп жатыр. Мұндай жағдайлар көптеп кездеседі. Алаяқтар адамдарды “биржалық ойынға” немесе белгілі фирмаларға инвестиция салғаны үшін дивидендтер түрінде тез пайда табуға уәде береді. Петропавл қаласы полиция басқармасының қызметкерлері интернет-алаяқтықтың алдын алуды үнемі жүргізеді. 13-15 тамыз аралығында прокуратураның үйлестіруімен бұл жұмыс “Аnti-fraud” жедел алдын алу іс-шарасы шеңберінде күшейтілді. Қалалық ПБ-ның “Киберпол” жедел бөлімшелері халық көп жиналатын орындарда жадынамалар таратады, еңбек ұжымдарымен кездесулерде интернет-алаяқтық схемаларын түсіндіреді. Бүгінде “Қызылжар су” ЖШС қызметкерлері мен “Океан” сауда үйінің жанындағы базарға келушілер полиция мен прокурорлардың аудиториясына айналды.

– Өзіңіздің құпия деректеріңізді сеніп тапсыруға, бейтаныс қосымшаларды орнатуға болмайды, ресми арналар арқылы қаржыға қатысты кез келген ақпаратты тексеру қажет. Сондай-ақ “Egov” жеке кабинетінде банктік қарыздар мен микрокредиттер алудан ерікті түрде бас тарту қызметін пайдалануды ұсынамыз, – дейді Петропавл қалалық ПБ бастығы Марат Жұмалиев.

Ақпарат көзі Polisia.kz сайтында: https://polisia.kz/sqo-da-politsejler-kop-taralghan-internet-alayaqtyqtyng-turleri-turaly-eske-saldy/