Елордада Дүниежүзілік қытай тілі күніне орай, халықаралық деңгейдегі семинар өтті. Іс-шараны Пекин тілі және мәдениет университетінің Қазақстандағы филиалы мен Астана халықаралық университеті бірлесе ұйымдастырды, деп хабарлайды BAQ.KZ тілшісі.
Семинарға ҚХР-дың Қазақстандағы Төтенше және өкілетті елшісі Хань Чуньлин арнайы қатысты. Өз сөзінде ол Қытай мен Қазақстан арасындағы мәдени байланыстардың тұрақты тереңдеп келе жатқанын атап өтті.
Қытай тілі – бұл жай ғана қаріптер жүйесі емес, бұл – 5000 жылдық өркениеттің коды. Бүгінгі таңда ол заманауи технологиямен үндесіп, жаңа мағынаға ие болыа жатыр, – деді елші.
Дипломат «Тяньвэнь» (Айды зерттеу жобасы) мен Huawei-дің «Хунмэн» операциялық жүйесін тілдің ғылыммен және поэзиямен табиғи байланысының нақты мысалы ретінде келтірді.
Қытай тілі – өркениеттер арасындағы көпір. Қазақстан мен Қытай арасындағы достық – бұл жай ғана екіжақты байланыс емес, бұл – адамзаттың ортақ болашағына бағытталған сенімді қадам, – деп түйіндеді ол.
Қазақстанда қытай тіліне деген қызығушылық артып келеді. Бүгінде елде бес Конфуций институты жұмыс істейді. Елші осы бағыттағы жұмыстарға атсалысып жүрген мұғалімдерге алғысын білдірді.
Абай айтқандай, “Шын цивилизация – түрлі тілдердің ойы бірін-бірі жарыққа шығаратын сәтте көрінеді”. Біз де осы рухта мәдени диалогты жалғастыруымыз керек, – деді Хань Чуньлин.
Білім – тіл арқылы, тіл – мәдениет арқылы сіңеді
Семинар барысында сөз алған Астана халықаралық университетінің ректоры Серік Ирсалиев қытай тілін оқытудың маңызын тілге тиек етті.
Қытай тілін сапалы үйрету – бұл тек білім беру емес, бұл – мәдениетті тану, оны құрметтеу және ұрпаққа жеткізу. Бұл – біз үшін де, болашақ үшін де маңызды миссия, – деді ректор.
Ирсалиевтің айтуынша, Қазақстан мен Қытай арасындағы білім беру байланысы соңғы жылдары елеулі деңгейге көтерілген. Бүгінде Қытайда 4000-ға жуық қазақстандық студент, ал Қазақстанда 1000-нан астам қытайлық студент білім алып жатыр.
Астанадағы Пекин тілі және мәдениет университетінің филиалы – осы стратегиялық серіктестіктің нақты жемісі. Биыл мұнда 30 қытай тілі мұғалімі мен 50 аударма маманы даярланбақ.
Бүгінгі семинар – тәжірибе алмасу мен кәсіби байланыс орнатуға арналған маңызды алаң. Бұл тек білім емес, сенімді әріптестікке негізделген ұзақмерзімді қатынастың бастамасы, – деді Серік Ирсалиев.
Еске сала кетейік, осыған дейін қай тілді үйренгенде өмір ұзаратыны туралы жазғанбыз.