Мектеп асханаларына жаңа талап енгізілді

 Оқу-ағарту министрлігі мектеп асханаларына қойылатын талапты қатаңдатты. Бұл туралы ведомство редакциямыз жолдаған ресми сауалына берген жауабында мәлім етті, деп хабарлайды BAQ.KZ тілшісі.

Енді жеткізушілерден СЭС қорытындысы міндетті түрде сұралады, ал тегін тамақ алушылардың есебі цифрланады.

Мектептердегі тамақтану сапасын жақсарту үшін өткен жылы ҚР Оқу-ағарту министрлігінің Балалардың құқықтарын қорғау комитеті бірқатар жүйелі шаралар қабылдады.

Тамақтану нормалары қайта қаралды, асхана қызметкерлеріне қойылатын талаптар күшейтілді, жеткізушілерге санитариялық-эпидемиологиялық қызметтің қорытындысын алу міндеттелді, – делінген министрлік жауабында.

Сонымен қатар, тегін тамақ алушылардың есебі автоматтандырылды, ал мектеп асханаларындағы күнделікті бақылау бракераждық комиссиялар арқылы жүзеге асырылады. Бұл комиссиялардың жұмысы міндеттелген.

Барлық өңірде ата-аналар, қоғамдық ұйым өкілдері мен мәслихат депутаттарының қатысуымен ведомствоаралық сараптамалық комиссиялар жұмыс істейді. Олар қоғамдық бақылау жүргізуге тартылған.

Ал жалпы мектептердегі тамақтану сапасына мемлекеттік бақылауды Денсаулық сақтау министрлігінің Санитариялық-эпидемиологиялық бақылау комитетінің аумақтық бөлімшелері атқарады.

Қазіргі таңда білім беру ұйымдарына арналған жаңа тамақтану стандарты әзірленіп жатыр.