Мейіржан Төребаев қаржы пирамидасынан тұрақты түрде ақша алып тұрған – прокурор

Осы қаржы пирамидасын жарнамалаған елімізде танымал вайнер әрі блогердің біреуі шетелге қашып кеткен, деп хабарлайды Экспресс К.

“Mudarabah Capital” қаржы пирамидасын ұйымдастыру бойынша 14 күдікті адам тергеліп жатыр. Олардың арасында танымал вайнер әрі блогер Мейіржан Төребаев, Мейірхан Шерниязов және Әзізжан Саидбаев бар.

Қазір олардың және туыстарының мүлкі тәркіленіп алынды. Алайда жылжымалы және жылжымайтын мүліктің тағдырын сот шешетін болады. Тәркіленген мүлік арасында 4 жер учаскесі, 10 пәтер, 1 дүкен, 5 үй мен 2 автокөлік бар екенін айта кетейік.

“Вайнер, блогер дегендер де қарапайым адамдар. Конституцияға сәйкес, олардың қатардағы азаматтар сияқты құқықтары мен міндеттері бар. Қылмыстық қудалау органдары ешкімді бөліп-жармайды, бізге олардың мәртебесі мен жұмыс орны маңызды емес. Қаржы пирамидасын жарнамалаған 3 вайнер де қылмыстық жауапкершілікке тартылады”, — деді Санжар Әділов.

Оқи отырыңыздар:

• 4 пайыздық автокредиттің шарты белгілі болды
• Қаңтардағы қақтығыстарға ең белсенді қатысқандардың бірі — “Дикий Арман”

Оның айтуынша, прокурордың өтініші бойынша Мейіржан Төребаев пен Мейірхан Шерниязов кепілдік беріп, бостандықта жүр. Дегенмен үшінші күдікті Әзізжан Саидбаев тергеу органдарынан қашып кеткен. Қазір ол сырттай қамауға алынып, халықаралық іздеуде жүр.

Осы іске байланысты Алматы қаласы прокурорының орынбасары Нұрлан Ауғанбаев “Время” газетіне сұхбат беріп, кейбір жайттарға пікір білдірген екен.

“Қылмыстық іспен таныстым, тек өз пікірімді айта аламын. Біріншіден, вайнерлер өзінің танымалдылығын пайдаланып, жаңа клиенттерді жастар арасынан тарқан. Мейіржан мен Мейірханның қаржы пирамидасын белсенді түрде жарнамалағаны да анық. Осыған қоса екеуі де компанияның құрылтайшысы, яғни олар кәсіпорын айналымындағы ақшаның ұлғаюына мүдделі болды”, — дейді Нұрлан Ауғанбаев.

Оның айтуынша, қазір адвокаттар “Мейіржан Төребаев компанияның құрылуына қатыспады, оның иесі емес” дегенді алға тартып жатыр.

Нұрлан Ауғанбаевтың айтуынша, Instagram жұлдыздары компанияның ислам инвестициясымен емес, жай ғана ақша тартумен айналысқанын білмеуі мүмкін емес.

Біз бұған дейін осы қаржы пирамидасына 20 миллион теңге салған әйел өзін-өзі өртеп жібергені туралы жазған едік.