Қарағанды: космомониторингтің көмегімен 700-ден астам қоқыс үйінділері анықталды

 Өткен жылы Қарағанды облысында ғарыш мониторингі арқылы 739 рұқсат етілмеген қоқыс орны анықталды, оның 680-і жойылды. Экологиялық заңнаманы бұзушылардың 50-ден астамы әкімшілік жауапкершілікке тартылды.

Тұрмыстық қалдықтар мен құрылыс қоқыстарын заңсыз лақтыру – экологтар мен жергілікті атқарушы органдар үнемі күресіп келе жатқан мәселе. Жүргізіліп жатқан профилактикалық жұмыстарға қарамастан, рұқсат етілмеген полигондар қайта пайда болады. Олар ғарыштық мониторингтің көмегімен анықталады және көбінесе экологиялық заңнаманы бұзушыларды анықтауға мүмкіндік жоқ. Сондықтан жергілікті атқарушы органдар полигондарға қоқыс шығаруға мәжбүр.

Мәселен, өткен жылы облыс аумағында 739 қоқыс орны анықталды.

Қарағанды облысының Экология департаментінің басшысы Дархан Исжанов Өңірлік коммуникациялар қызметі платформасында өткен брифингте экологтар осы бағытта қандай жұмыстар жүргізіп жатқаны туралы айтып берді.

– Рұқсат етілмеген полигондардың пайда болу проблемасы жер ресурстарының сапасына теріс әсер етеді. Экология департаменті полиция қызметкерлерімен бірлесіп 2023 жылы 340 рейдтік іс-шара өткізді, соның нәтижесінде ҚР ӘҚБтК 505-бабы бойынша 42 хаттама жасалды. Сондай-ақ, қалдықтарды заңсыз орналастырудың 11 фактісі тоқтатылды, нәтижесінде бұзушылар жауапқа тартылды, – деді Дархан Исжанов. – Экология департаменті облыс тұрғындарын табиғатқа ұқыпты қарауға және полигондардың пайда болуына жол бермеуге шақырады.

Өткен жылдың қыркүйек айында департамент World Cleanup day 2023 Дүниежүзілік экологиялық акциясына қосылды, оған облыстың 34 мыңнан астам тұрғыны қатысты. Үлкен сенбіліктің қорытындысы бойынша полигонға 2 мың тоннадан астам қалдықтар жиналып, шығарылды. Биылғы жылы да акция қолдау табады.

– Сондай-ақ, полиция қызметкерлерімен бірлескен рейд барысында ЖЭО-1 ауданында қалдықтарды рұқсатсыз шығару фактісі анықталды. Құқық бұзушы ұсталып, ӘҚБтК-нің 344-бабының 2-бөлігі бойынша әкімшілік жауапкершілікке тартылды және 25 АЕК-ке айыппұл салынды.

Биыл да рұқсат етілмеген полигондар бойынша рейдтік іс-шараларды жалғастыруды жоспарлап отырмыз, – деп толықтырды облыстың бас экологы.

Қарағанды облысының аумағында барлығы 168 ҚТҚ полигоны бар, оның 51-і заңдастырылған, ал 117-сінде рұқсат құжаттары жоқ. Бұл мәселені шешу үшін Қарқаралы, Балқаш, Абай және Ботақара, Нұра, Ағадыр кенттерінде сұрыптау тізбегі көзделетін полигондар салу жоспарлануда.