Канвондағы жасөспірімдер Олимпиадасы өтетін нысандарды қар басып қалды

АСТАНА. KAZINFORM – Сенбі күні Оңтүстік Кореяда 2024 жылы жасөспірімдердің қысқы Олимпиадасы өтетін провинцияның біраз бөлігіне қалың қар жауды. Канвондо провинциясының әкімшілігі қолайсыз күн райына байланысты төтенше жағдай режимі енгізілгенін хабарлады, деп жазды Yonhap ақпарат агенттігі.

Корея метеорологиялық басқармасының мәліметінше, 20 қаңтар күні жергілікті уақыт бойынша сағат 21:00-дегі жағдайға сәйкес, Канвондо провинциясының Каннын қаласында шамамен 41,6 см қар жауды.

Провинцияның таулы аймақтарында қалың қар туралы ескерту күшінде, өйткені жексенбіге дейін қар одан да көп жауады, деп хабарлады Yonhap.

Жергілікті билік сенбі күні хабарлағандай, қарды тазалауға 5 мыңнан астам адам және 700-ге жуық арнайы техника жұмылдырылған. Сенбі күні жауған қалың қар Оңтүстік Кореяның Канвондо провинциясында 2024 жылы өтетін жасөспірімдер арасындағы қысқы Олимпиада ойындарындағы бірқатар шараны тоқтатты.

Оңтүстік Кореядағы жасөспірімдер арасындағы IV қысқы Олимпиада ойындары жұма күні басталып, 1 ақпанға дейін жалғасады. Канвон-2024 ойындарына 80-ге жуық елден жиналған 1800 спортшы қатысады. Мұнда спорттың 7 түрінен 15 бағдарлама бойынша 81 медаль жиынтығы ойнатылады.