Қала бюджеті өсіп, 779,2 млрд теңгеге жетті

Бүгін Шымкент қаласының әкімі Ғабит Сыздықбековтің төрағалығымен өткен аппараттық мәжілісте бірқатар маңызды мәселелер қаралды. Шымкент әкімінің баспасөз қызметінің мәліметінше, жиында жұмыспен қамту және әлеуметтік қорғау басқармасының басшысы Жанат Өтебаева отбасының цифрлық картасын қалыптастырудың ағымдағы мәселелері туралы баяндады.

Мемлекет басшысы Қасым-Жомарт Тоқаевтың Жолдауында Отбасының цифрлық картасы және Әлеуметтік әмиян сияқты тәсілдерді енгізу туралы айтылған болатын. Осы орайда еңбек және халықты әлеуметтік қорғау министрлігі тарапынан арнайы «Отбасының цифрлық картасы» дерекқоры әзірленген. Аталған дерекқорда отбасылардың әлеуметтік жағдайын 5 санатқа бөлген:

А санатында – әлеуметтік жағдайы жақсы 3,9%;
В санатында — әлеуметтік жағдайы қанағаттанарлық 39,5%;
С санатындағы- әлеуметтік жағдайы төмен 32,3%;
Д санатындағы- әлеуметтік жағдайы дағдарыс 20,6%;
Е санатындағы- әлеуметтік жағдайы мүшкіл 3,7%.
Министрліктің тапсырмасына сәйкес 2025 жылға дейін Д және Е санатындағы азаматтардың үлесін 5 пайызға төмендету немесе Шымкент қаласы бойынша 79 850 отбасыға жеткізу жоспарлаған. Отбасылық цифрлық картаның мақсаты – халықтың өмір сүру сапасын жақсарту, әлеуметтік жағдайы төмен отбасыларға мемлекеттік қызмет көрсету сапасын арттыру.

Сондай-ақ жиында экономика және бюджеттік жоспарлау басқармасының басшысы Е.Есқараев атқарылған жұмыстар бойынша есеп берді және қалаға бекітілген көрсеткіштерге қол жеткізу туралы баяндады. Қала бюджеті өткен жылмен салыстырғанда 18,7 пайызға артып, 779,2 млрд теңгені құрады. Бюджеттің 51 пайызынан астамы әлеуметтік салаға бағытталған.

Өңірдегі халықтың табысын арттыру бағытында жүйелі шаралар қабылданып, республикада алғашқылардың бірі болып 15 мыңға жуық бюджеттік қызметкерлердің жалақыларына қосымша 50 мың теңге үстемеақы тағайындалды.

Мемлекет басшысының бастамасымен «Халық қатысатын бюджет» жобасы да сәтімен жүзеге асырылып келеді. Биылғы жылы бұл бағытта 228 жобаға 5,8 млрд теңге қаралды. 2024 жылдың 9 айының қорытындысымен қаланың барлық макроэкономикалық көрсеткіштерінде оң динамикалық өсім қалыптасты. Тұрғын үй алаңы 38,8, құрылыс жұмыстары 30,6, көлік қызметі 26,8, сауда көлемі 16,9, инвестиция 10,1, өнеркәсіп өнімі 2,0 пайызға артты.

Ғабит Сыздықбеков аппарат мәжілісінде жылу беру маусымының басталуына байланысты жауапты басқарма басшылары мен аудан әкімдеріне жұмысты ширатып, өзекті мәселелерді дер кезінде шешуді ескертті.