Елордалық №119 мектепте ұстаздарға арналған «Professor Sabagy» және «Mathematical Club» бірегей білім беру алаңдары жұмысының қорытындысына арналған есептік іс-шара өтті, деп хабарлайды Астана әкімдігінің ресми сайты.
Іс-шарада Астана қаласы әдістемелік орталығы басшысының орынбасары Алма Мұхамеджанова жобалардың мән-маңызы туралы айтып берді.
«Бұл екі алаң бірнеше жылдан бері жұмыс істеп келеді және өз тиімділігін дәлелдеп, жұртшылықтың оң бағасына ие болды. Оның мәні – педагогтердің үздіксіз білім алуын қамтамасыз ету. Ең алдымен, әрқайсысына жеке тоқталатын болсақ, «Professor Sabagy» жобасын тілдерді және оқу процесіне ұлттық құндылықтарды интеграциялауды жүргізетін үш профессор тікелей басқарады.
Бұл жоба мұғалімдердің жұмысын жеңілдете отырып, білім алушылардың оқу сауаттылығын дамытуға ықпал етеді», – дейді ол.
Оқу сауаттылығын дамыту бүгінде мемлекеттік маңызы жоғары міндеттердің біріне айналды. Мемлекет басшысы Қасым-Жомарт Тоқаев «біз кітап оқитын ұлтқа айналуымыз керек» деп бірнеше рет атап өтті. Себебі өсіп келе жатқан ұрпақтың мәдениеті мен зияткерлік әлеуеті ең алдымен кітап оқу арқылы қалыптасады.
Алайда тәжірибе көрсеткендей, гуманитарлық бағыттағы жобалар нақты ғылымдармен ұштасқанда нәтижесі әлдеқайда тиімді бола түседі.
«Ал «Математикалық клуб» мұғалімдерді олимпиадалық тапсырмалар әзірлеуге, республикалық деңгейдегі түрлі іс-шараларға – олимпиадалар мен математикалық сауаттылыққа қатысты зерттеулерге дайындауға бағытталған. Бұл оқушылардың математикалық сауаттылығын дамытуға ықпал етеді», – дейді Алма Мұхамеджанова.
Биылғы басты жетістіктің бірі – екі бағыттың өзара үйлесімі. Республикалық «Ойсандық» байқауында математика мұғалімдері филологтармен күш біріктіріп, бас жүлдені жеңіп алды.
«Биыл біз бірқатар нәтижеге қол жеткіздік. Астана қаласының командасы, оның ішінде математикалық клубтың қатысушылары республикалық «Ойсандық» байқауында Гран-при иеленді. Олар бұл байқауға қазақ тілі мұғалімдерімен бірге қатысты. Бұл жетістікке «Professor Sabagy» курстары мен математикалық клубтағы дайындықтың ықпалы зор болды. Соның нәтижесінде математикалық және оқу сауаттылығын ұштастыруға мүмкіндік туды», – деп қорытындылады Алма Мұхамеджанова.
№119 мектепте өткен жобалардың таныстырылымы мектеп пәндері арасындағы шекараның біртіндеп жойылып келе жатқанын көрсетті.
Әртүрлі бағыттағы педагогтер логика мен тілді ұштастырып, бірлесе жұмыс істегенде, оның нәтижесі де айрықша болатыны байқалды. Жобалар өз жұмысын жалғастырып жатыр, ал Астана мұғалімдерін алда әлі талай жарқын жетістік күтіп тұр.