Бір жылда пәтер бағасы біршама қымбаттады

Бір жылда (2024 жылғы наурызбен салыстырғанда) жаңа тұрғын үйлерді сату бағасы 5,9%, қолданыстағы пәтерлер нарығындағы баға 6,7% өсті, деп хабарлайды BAQ.KZ.

Ұлттық статистика бюросының мәліметінше, абаттандырылған тұрғын үйді жалға алу төлемі былтырғы тиісті аймен салыстырғанда 2025 жылғы наурызда 11,6% жоғарылаған.

Өңірлер бөлінісінде жылдық мәнде жаңа тұрғын үй бағасының ең жоғары өсімі Павлодарда (18%), Көкшетауда (15%) байқалды. Қолданыстағы пәтерлер нарығында баға едәуір Атырау (15,8%), Павлодар (12,9%), Ақтөбеде (12,7%), ал тұрғын үйді жалға беру нарығында – Астана (25,4%), Талдықорған (23,8%), Семей (22%) қалаларында көтерілді.

 Бір айдың ішінде (2025 жылғы ақпан мен наурызды салыстырғанда) жаңа тұрғын үйді сату – 0,6%, ал пәтерлерді қайта сату 1,4% өсті. Абаттандырылған тұрғын үйді жалға беру төлемі 1% арзандады.

2025 жылғы наурыз айында тұрғын үйді алып-сату бойынша 27 739 мәміле тіркелген, оның ішінде жеке үйлер бойынша – 5 897 және көппәтерлі үйлердегі пәтерлер бойынша – 21 842 мәміле жасалды. 2025 жылдың ақпанымен салыстырғанда (29 022) тұрғын үйді сатып алу-сату мәмілелерінің саны 4,4%-ға азайды. Мәмілелер саны бойынша Астана (5 652 – 20,4%) және Алматы (5 069 – 18,3%) қалалары, сонымен қатар, Қарағанды облысы (2 130 – 7,7%) көш бастап тұр. Мәмілелер санының ең азы Ұлытау облысында – 357 мәміле (1,3%).

2025 жылдың ақпанымен салыстырғанда наурызда мәмілелер санының ең көп өсімі Шығыс Қазақстан (+16,8%), Алматы (+11,4%) және Атырау (+11,3%) облыстарында тіркелді. Ал бір айдағы ең көп төмендеу Жамбыл (-23,3%), Батыс Қазақстан (-18,4%) және Маңғыстау (-18,1%) облыстарында орын алды.

2025 жылдың ақпанымен салыстырғанда, көппәтерлі үйлердегі пәтерлер бойынша мәмілелер саны 3,7% (848 мәмілеге) азайды. 2025 жылдың наурыз айында пәтерлер бойынша барлығы 21 842 мәміле жасалды, бұл мәмілелердің жалпы санының 78,7%-ы. Көппәтерлі үйлердегі тұрғын үй саудасының негізгі үлесі Астана (25,3%), Алматы (21%) қалаларына және Қарағанды облысына (8,3%) тиесілі. Бөлмелер саны бойынша 2 бөлмелі пәтерлер сатылымы басым болды, 2025 жылдың наурыз айында олар бойынша 8 211 мәміле ресімделген.

2025 жылдың ақпан айымен салыстырғанда наурызда жеке тұрғын үйлер бойынша мәмілелер саны 6,9%-ға (435 мәмілеге) азайды. Наурызда барлығы 5 897 мәміле тіркелген. Жеке тұрғын үйлер бойынша мәмілелер санының ең көп өсімі Астана (+20,6%) қаласында, Шығыс Қазақстан (+15,7%) облысында және Алматы (+5,8%) қаласында байқалды. Мәмілелер санының ең үлкен төмендеуі Батыс Қазақстан (-20,3%), Маңғыстау (-19,7%) және Атырау (-14,4%) облыстарында тіркелді.

2025 жылғы наурызда тұрғын үйді сатып алу-сату мәмілелері былтырғы жылдың тиісті айымен салыстырғанда 5,1%-ға көбейген, ол кезде 26 389 мәміле ресімделген болатын. Мәмілелер санының ең жоғары өсімі Ұлытау облысында (66%) байқалды, ең үлкен төмендеу – Түркістан облысында (-25,7%). 2025 жылдың қаңтар-наурыз айларындағы мәмілелер саны 2024 жылғы қаңтар-наурыз аралығымен салыстырғанда 1,1% төмендеген.
 

ҚР СЖжРА Ұлттық статистика бюросы тұрғын үй бағасы бойынша ай сайын мониторинг жүргізеді. Баға индекстері облыс орталықтары мен Астана, Алматы, Шымкент қалалары бойынша іріктелген байқау деректері негізінде қалыптастырылады. Жаңа тұрғын үйлер бойынша ақпарат сату бойынша операциялар жүргізетін құрылыс компанияларынан жиналады, бұл ретте пәтердің бастапқы және алдын ала таза әрленгендегі бағасы ескеріледі. Пәтерлерді қайта сату және жалға алу бойынша деректер интернетте, бұқаралық ақпарат құралдарында орналастырылатын хабарландырулар негізінде жиналады. Бағаларды есептеу кезінде бір, екі, үш бөлмелі пәтерлер бойынша ұсыныстар есепке алынады.