Тауыс құсы Сарыағаштың символы болуға жақын

Түркістан облысы, Сарыағаш ауданы Дербісек елді мекеніндегі «Рахманберди» шаруа қожалығы бүгінгі таңда ерекше құс түрлерін өсірумен айналысуда. Осы күнге дейін тауыс өңір үшін таңсық құс болатын. Үй құсының бұл түрін қазір «Рахманберди» шаруа қожалығының басшысы Рахманберді Өсербаев алғашқылардың бірі болып шаруа қожалығында өсіруді қолға алған. Сонымен қатар қырғауылдың 7 түрі, тауықтың 5 түрі, кептер, түйеқұс, азияттық кекілік, қазы, үйректің 2 түрі, күрке, бөдене бағумен де айналысып жатыр.

Сырттан әкелінген құстар қолға үйретілді. Күтімі ерекше тауыс жылына 6 рет қана жұмыртқалайтын көрінеді. Одан өзге, бұл құс көктем айларында ғана ерекше билейді. Алғашында 2 тауыс құсын сатып алып, жерсіндірген кәсіпкер оны көбейтіп санын 40-қа жеткізген. Сондай-ақ құсқа қызығушы азаматтардың сұранысына сәйкес, 30 шақты тауысты сатып пайдасын да көріпті.
Алдағы уақытта жеке кәсіпкер құс шаруашылығын кеңейтумен қатар, балық шаруашылығын дамытуды да жоспарлап отыр.

2021 жылы аудандағы құстың басы 623524-ке жеткізілді. Оның ішінде 513212-сі құс фабрикаларында болса, 2509 бас құс жеке кәсіпкерлер мен шаруа қожалықтарында өсіріліп жатыр. Қалғаны — жұртшылық ауласында.

Түркістан облысы әкімінің баспасөз қызметі