Шегірткемен күрес. Қызылорда облысында 10 мың га жерге дәрі себілді

 Қызылорда облысында көктемгі маусымдық қорғау шаралары аясында үйірлі шегіртке зиянкестеріне қарсы белсенді күрес жүріп жатыр. Аймақта жоспарланған 17 132 гектардың 10 524 гектары ауыл шаруашылығы алқаптарында өңделді, деп хабарлайды BAQ.KZ.

Өңдеу жұмысы Арал ауданына қарасты Қарақұм, Сазды, Аққұм, Қосаман және Жіңішкеқұм ауылдық округтерінде жүргізілді. Осы жұмыстарға 2 жеңіл авиация кемесі, 2 аса жеңіл ұшақ, 12 жерүсті техникасы, 5 дрон, 45 арқаға асылатын бүріккіш, 48 мониторинг маманы тартылған.

Облыс бойынша шегірткеге қарсы күрес жүргізу үшін барлығы 60 024 гектар аумақ жоспарланған. Барлық жоспарланған аумақ бойынша мердігер ұйымдармен келісімшарттар жасалған.

Өңірде шегірткеге қарсы күрес шараларын үйлестіру мақсатында облыс әкімінің орынбасары басқаратын жедел штаб құрылған. Мұндай штабтар аудан деңгейінде де жұмыс істеуде.

Жергілікті жерлерде мониторинг жүргізу және жұмыстарды үйлестіру үшін 279 адам тартылған. 445,8 мың гектар жерде шегірткелердің дернәсілдерін анықтау мақсатында зерттеу жұмыстары жүргізілді.

Қазіргі уақытта егін алқаптарында шегіртке зиянын тигізу фактілері тіркелген жоқ. Өңдеу шараларын ҚР Ауыл шаруашылығы министрлігінің Агроөнеркәсіптік кешендегі мемлекеттік инспекция комитеті бақылауда ұстап отыр.