ІІМ басшысы Түркістан облысында полиция бөлімінің жаңа ғимаратын ашты

Ішкі істер министрі Ержан Саденов жұмыс сапарымен Түркістан облысына барып, өңірлік полицияның бірқатар жаңа ғимараттарын ашты, – деп хабарлайды Polisia.kz.

Ол 100 мыңнан астам тұрғыны бар Сауран ауданында жаңа полиция ғимаратының ашылу рәсіміне қатысты. Үш қабатты нысанның жалпы ауданы 4 мың шаршы метрден сәл асады. Онда азаматтарды қабылдау және тиімді қызмет ету үшін қажетті барлық заманауи жабдықтар қарастырылған.

Сондай-ақ министр қасиетті аймақта қызмет атқарып, тұрғындардың тыныштығын сақтауға үлес қосып жүрген Ұлттық ұлан әскери қызметшілерінің қызметімен танысты. Тәуелсіздік жылдары Түркістан облысында қызметтік міндеттерін атқару кезінде 60-тан астам полиция қызметкері қаза тапқан. Олардың ерлігі ешқашан ұмытылмайды. Осы мақсатта департамент жанына ескерткіш орнатылды.
Министр Ержан Саденов пен облыс әкімі Дархан Сатыбалды ескерткішке гүл шоқтарын қойып, бір минут үнсіздікпен батырларды еске алды.

Сонымен қатар қонақтарға жаңа арнайы техника көрсетілді. Ведомство басшысы жергілікті тәртіп сақшыларын жаңа жұмыс орындарымен құттықтап, бірқатар маңызды міндеттер жүктеді. Соның ішінде цифрлық технологияларды қолдану аясын кеңейту және жұмыс процестерін оңтайландыру бар. Одан бөлек қызметтік тәртіпті нығайтуға баса назар аударды.

Полиция генерал-лейтенанты жаңадан ашылған қызмет көрсету орталығына барды. Орталықта бір уақытта 50 адамға қызмет көрсету мүмкіндігі қарастырылған. Мұнда полиция жұмысына қатысты халықтың мәселелері жедел қаралады.

Ақпарат көзі Polisia.kz сайтында: https://polisia.kz/iim-basshysy-turkistan-oblysynda-politsiya-bolimining-zhanga-ghimaratyn-ashty/