Астанада дәстүрлі қысқы триатлоннан жарыс өтті

 АСТАНА. KAZINFORM – Бүгін елордадағы Триатлон саябағында қысқы триатлоннан дәстүрге айналған жарыс өтті. Оған бас аяғы 200-ге жуық әуесқой спортшылар қатысы.

«Астана төрінде триатлон жарысын 4-ші мәрте өткізіп жатырмыз. Биылғы жарыстың ерекшелігі ретінде эстафета бойынша жеңімпаздар анықталды. Алғашқы жарысымызда 50-дей ғана спортшы қатысса, енді олардың қатары 3-4 есеге көбейді. Бүгінгі жарыс барысын қадағалай отырып, келесі жылы балаларға да арнап сайыс түрін кіргізуді жоспарлаймыз. Дәл осы триатлон жарысында жаздық спорттың мықтылары мен шаңғының көшбасшылары соңынан дейін чемпион болуға барын салады. Әйтсе де, шешуші сайыс шаңғы болғандықтан, Солтүстік өңірдің тумалары топ жарады», – деді Астана қаласының Триатлон федерациясының президенті Евгений Больгерт.

Жарыс барысында қатысушылар 3 түрлі спорт түрі бойынша сайысқа түсті. 

• жүгіру – 2,5 шақырым;
• велоспорт – 3 шақырым;
• шаңғы жарысы – 2,5 шақырым.

Ұйымдастырушылардың пікірінше Астанадағы жарысқа тек қана қала тұрғындары ғана емес, Қарағанды, Көкшетаудан да арнайы түрде келетіндердің қарасы көп.

Күннің аяздығына байланысты турнир таңғы 9:00-ден 12-ге ауыстырылған еді. Бұл жайында қатысушылар да өз ойын айта кетті.

«Ауа-райы -20 градустан асып тұрса да, бүгінгі күн жарыс үшін өте ыңғайлы болды. Шаңғы спортынан ұлттық ққраманың мүшесі болсам да, дәл осындай триатлонға бірінші рет қатыстым. Әр спортшы тек жақсы көрсеткішке қол жеткізгісі келеді. Міне сол жоспарым орындалды», – деді Щучинсктен арнайы келген Святослав Матасов. 

Триатлон федерацияларының айтуынша, бұл 2024 жылдағы алғашқы жарыс. Жыл соңына дейін әлі 10-нан астам турнир өткізіліп ұпай сандары бойынша жалпы жеңімпаздар белгілі болады.

Жарыс соңында әр жас тобындағы триатлон жеңімпаздары марапатталып, ақшалай сыйақы берілді.

Енді кезекті триатлон бәсекесі наурыз айының ортасында жабық кешендегі спорт сарайында ұйымдастырылады.